Meta l-ħafna jkun ifisser ftit
L-ikel jidher li hu bla limitu u varjat bħal qatt qabel. Meta mmorru nixtru, l-għażla ta' kull tip ta' ikel donnha ma tispiċċax. Imma huwa minnu li l-ikel hu varjat daskemm jidher? Mhuwiex hekk. Tant hawn supermarkits li qed ikollhom bżonn provvista enormi tal-istess prodotti. Konsegwenza t'hekk huma qed jiffavorixxu ftit prodotti tar-raba' biex l-offertà tagħhom tkun uniformi, ikun jista' jinħażen sew u jkun faċli biex jinbiegħ. Is-supermarkits qegħdin ifaqqsu madwar id-dinja kollha, anke f'dawk il-pajjiżi li qed jiżviluppaw. U kollha kemm huma qed ibigħu l-istess prodotti. Għaldaqstant huwa minnu li hemm ħafna ikel ippakkeġġjat differenti, imma l-kontenut huwa l-istess! U dan xi jfisser għall-bijodiversità?
L-aktar prodotti tar-raba' użati fid-dinja huma z-zokkor (sugar cane), il-qamħirrun, il-qamħ u r-ross.
F'pajjiżi li qed jiżviluppaw kien hemm 'rivoluzzjoni ta' supermarkits', għax in-numru tagħhom żdied b'rata mgħaġġla ħafna. Fid-disgħinijiet, 5% biss tal-ikel kien jinbiegħ fis-supermarkits. Illum qabeż il-50%!
L-istandardizzazzjoni hija meta s-supermarkits jiddettaw il-qies u l-għamla tal-ħaxix u l-frott. Minbarra li dan jikkawża telf ta' bijodiversità, huwa l-kawża ewlenija tal-ħela ta' ikel.
Fl-Afrika, prodotti tar-raba' tradizzjonali bħad-dekkuk (millet) u s-sorgu (sorghum) - it-tnejn huma pjanti ċereali - qegħdin jonqsu, filwaqt li l-qamħirrun qed jiżdied. Il-qamħirrun ġie introdott fl-Afrika mill-Amerika u minkejja li ma tantx jiflaħ għan-nixfa, xorta waħda qed jieħu s-suq.