Il-fażola deheb
Fil-Bolivja, pajjiż tal-Amerika Latina, il-pajsaġġ qed jinbidel b'rata mgħaġġla. Fejn qabel kellek bdiewa li jiżirgħu u jkabbru l-patata, il-qargħa ħamra, il-qamħ u prodotti oħrajn, u jrabbu t-tiġieġ, il-ħnieżer u annimali oħrajn, issa baqa' biss għelieqi kbar bi prodott wieħed: is-sojja. Il-pajsaġġi li qabel kienu mimlijin ħajja u nies, issa m'għadekx tara ruħ fihom. Il-makkinarju ħadilhom posthom. Issa tara biss trakters kbar u kultant xi ajruplani biex jisprejjaw il-pestiċidi mis-sema. Imma għaliex hemm bżonn daqshekk sojja?
Il-biedja industrijali tuża makkinarju goff. Din it-tip ta' biedja taħdem biss fuq meded kbar fejn jitkabbar prodott wieħed biss. Dan jissejjaħ monoculture farming. Taf għalfejn din it-tip ta' biedja tikkawża problemi kbar lill-ambjent u lill-bijodiversità? Aqra dawn l-istejjer li ġejjin!
Is-sojja hija sors importanti ta' proteina u l-ammont ta' proteina li tista' tieħu minn ettaru ta' fażola tas-sojja huwa ogħla minn kull prodott ieħor li tista' tkabbar. Dan il-prodott għandu ħafna użi: biex tagħmel l-ikel, jintuża bħala għalf u anke għall-fjuwil.
Għalkemm is-sojja tissejjaħ fażola, fil-fatt hi kklassifikata bħala żerriegħa taż-żejt. Iż-żejt tas-sojja huwa t-tieni l-aktar żejt tal-ħaxix li huwa prodott, eżatt wara ż-żejt tal-palm. Dak li jibqa' minnu wara li jagħsrulu ż-żejt, jingħata bħala għalf lill-annimali.
'Il fuq minn 75% tas-sojja tintuża bħala għalf lill-annimali tal-irziezet. 6% biss tintuża fi prodotti tal-ikel bħalma hu t-tofu u l-ħalib tas-sojja.